GLEÐI - JÁKVÆÐNI - ÆVINTÝRI

Reykjadalur eru sumarbúðir í Mosfellsdal fyrir fötluð börn og ungmenni. Gleði, jákvæðni og ævintýri lýsa starfseminni vel. Þar er haft að leiðarljósi að ekkert sé ómögulegt og ævintýrin látin gerast. Árlega koma um 250 einstaklingar í Reykjadal á aldrinum 8-21 árs. Við leggjum áherslu á að hver og einn einstaklingur njóti sín á sínum forsendum. Vináttan er mikilvægur þáttur í starfseminni. Lögð er áhersla á að börnin geti eignast vini og séu fremst á meðal jafningja.

Styrktarfélag lamaðra og fatlaðra á og rekur Reykjadal. Í sumar eru fleiri valkostir um afþreyingu fyrir börn, ungmenni, fullorðið fatlað fólk og fjölskyldur fatlaðra barna vegna stuðnings félagsmálaráðuneytisins. Á fimmta hundrað einstaklingar taka þátt í sumarverkefnum Reykjadals, ævintýranámskeiði, sumarbúðum í Háholti í Skagafirði, fjölskyldufríi í Vík í Mýrdal og á Húsavík og sumarfríi fyrir fullorðið fatlaðra fólk. Þetta er annað árið í röð sem boðið er upp á þessi verkefni sem hafa notið mikilla vinsælda og verða vonandi fastur liður í starfsemi Reykjadals.   

„Reykjadalur þvílíkur staður. Það er varla hægt að lýsa því starfi sem fer fram þarna. Þvílík þjónusta og nálgun við fötluð börn. Að hjálpa þeim í að njóta sín sem best og að efla þau í átt að sjálfstæði.“ - foreldri um Reykjadal

Ekkert er ómögulegt

Í Reykjadal er hugmyndafluginu sleppt lausu og þar er haft að leiðarljósi að ekkert sé ómögulegt. Fötlun er ekki hindrun. Við finnum leiðir til að láta ævintýrin gerast.

 

Einstakt starfsfólk

Í Reykjadal starfar ungt fólk sem fyllir staðinn af orku og lífsgleði. Starfsfólkið okkar er hugmyndaríkt og hefur mikinn metnað fyrir því að gleðja gestina sem hjá okkur dvelja. 

Þú getur tekið þátt í að skapa ævintýri